hum jis taraf nikal paDe waraftagi ke sath

ham jis taraf nikal paḌe vāraftagī ke saath

manzil ne chuum chuum liyā sarḳhushī ke saath

ham jānte haiñ koī bahāna tarāsh kar

pesh ā.eñge vo ham se baḌī be-ruḳhī ke saath

vo jannat-e-nigāh jo hai ain-e-zindagī

aksar uThī hai merī taraf barhamī ke saath

shoḳhī sī kuchh jhalaktī hai un kī nigāh se

chalte to haiñ qadam-ba-qadam sādgī ke saath

kuchh bhī na kah sake mire hāl-e-tabāh par

sunte rahe fasāna-e-ġham ḳhāmushī ke saath

māyūs ho ke palTe jo aivān-e-husn se

phir aarzū lipaT ga.ī dīvāngī ke saath

vo sāmne hai manzil-e-jānāñ kī sarzamīñ

ai muḳhlisān-e-ishq chalo be-ḳhudī ke saath

matlab hī jaise kuchh unheñ 'iqbāl' se nahīñ

aa.e bhī haiñ vo dil meñ to kis sādgī ke saath

hum jis taraf nikal paDe waraftagi ke sath

manzil ne chum chum liya sarKHushi ke sath

hum jaante hain koi bahana tarash kar

pesh aaenge wo hum se baDi be-ruKHi ke sath

wo jannat-e-nigah jo hai ain-e-zindagi

aksar uThi hai meri taraf barhami ke sath

shoKHi si kuchh jhalakti hai un ki nigah se

chalte to hain qadam-ba-qadam sadgi ke sath

kuchh bhi na kah sake mere haal-e-tabah par

sunte rahe fasana-e-gham KHamushi ke sath

mayus ho ke palTe jo aiwan-e-husn se

phir aarzu lipaT gai diwangi ke sath

wo samne hai manzil-e-jaanan ki sarzamin

ai muKHlisan-e-ishq chalo be-KHudi ke sath

matlab hi jaise kuchh unhen 'iqbaal' se nahin

aae bhi hain wo dil mein to kis sadgi ke sath