hum junun ko zindagi ka mustaqar samjha kiye

ham junūñ ko zindagī kā mustaqar samjhā kiye

ai 'shifā' manzil kidhar thī aur kidhar samjhā kiye

vaa.e ye kotāhī-e-ehsās-o-tangī-e-nazar

zindagī ko zindagī bhar muḳhtasar samjhā kiye

kārvāñ pahuñche qarīb-e-sa.ī-e-anjām-e-safar

aur ham mafhūm-e-āġhāz-e-safar samjhā kiye

be-ḳhudī ne kis qadar gumrāh rakkhā ishq ko

ham tasavvur hī ko husn-e-mo'atabar samjhā kiye

dekh kar bhī un ko ham māyūs-e-nazzāra rahe

har nazar ko laġhzish-e-zauq-e-nazar samjhā kiye

husn ke rangīñ muamme ishq ke ġhamgīn raaz

kuchh samajh meñ to na aate the magar samjhā kiye

zarre zarre kā shu.ūr o zehn ko irfān thā

be-ḳhabar the ḳhud jo ham ko be-ḳhabar samjhā kiye

aaj tak ham ne faroġh-e-dil pe nazreñ hī na kiiñ

mehr-o-mah par munhasir apnī sahar samjhā kiye

dar-haqīqat vo halākat-āfrīñ niklī 'shifā'

ham jise ab tak mohabbat kī nazar samjhā kiye

hum junun ko zindagi ka mustaqar samjha kiye

ai 'shifa' manzil kidhar thi aur kidhar samjha kiye

wae ye kotahi-e-ehsas-o-tangi-e-nazar

zindagi ko zindagi bhar muKHtasar samjha kiye

karwan pahunche qarib-e-sai-e-anjam-e-safar

aur hum mafhum-e-aghaz-e-safar samjha kiye

be-KHudi ne kis qadar gumrah rakkha ishq ko

hum tasawwur hi ko husn-e-mo'atabar samjha kiye

dekh kar bhi un ko hum mayus-e-nazzara rahe

har nazar ko laghzish-e-zauq-e-nazar samjha kiye

husn ke rangin muamme ishq ke ghamgin raaz

kuchh samajh mein to na aate the magar samjha kiye

zarre zarre ka shuur o zehn ko irfan tha

be-KHabar the KHud jo hum ko be-KHabar samjha kiye

aaj tak hum ne farogh-e-dil pe nazren hi na kin

mehr-o-mah par munhasir apni sahar samjha kiye

dar-haqiqat wo halakat-afrin nikli 'shifa'

hum jise ab tak mohabbat ki nazar samjha kiye