hum kabhi chashm-e-zamana mein na pinhan honge

ham kabhī chashm-e-zamāna meñ na pinhāñ hoñge

ham har ik daur meñ har dil meñ numāyāñ hoñge

dard ban kar nafas-e-jāñ meñ samā jā.eñge

soz ban kar haram-e-dil meñ farozāñ hoñge

ham ḳhizāñ ho ke bhī haiñ raunaq-e-bazm-e-ālam

ham na hoñge to kahāñ jashn-e-bahārāñ hoñge

ham jaleñge ki tire naam kī lo raushan ho

ham ba-har-rañg tirī ziist kā sāmāñ hoñge

sozish-e-dard meñ hai 'arsh' qayāmat pinhāñ

vo bhī kyā hoñge jo is dard kā darmāñ hoñge

hum kabhi chashm-e-zamana mein na pinhan honge

hum har ek daur mein har dil mein numayan honge

dard ban kar nafas-e-jaan mein sama jaenge

soz ban kar haram-e-dil mein farozan honge

hum KHizan ho ke bhi hain raunaq-e-bazm-e-alam

hum na honge to kahan jashn-e-bahaaran honge

hum jalenge ki tere nam ki lo raushan ho

hum ba-har-rang teri zist ka saman honge

sozish-e-dard mein hai 'arsh' qayamat pinhan

wo bhi kya honge jo is dard ka darman honge