hum kahan aur dil-e-KHarab kahan

ham kahāñ aur dil-e-ḳharāb kahāñ

ai shab-e-ġham tirā javāb kahāñ

zindagī ke shu.ūr se baḌh kar

zindagī meñ koī azaab kahāñ

koī chehra ho ġhaur se paḌhiye

is se jāme.a koī kitāb kahāñ

dard-o-ġham kī udaas āñkhoñ meñ

aarzū ke hasīn ḳhvāb kahāñ

aao apnī sahar se pūchh to leñ

chhoḌ aa.ī hai āftāb kahāñ

ruuh jab ho ga.ī hai ḳhud ghāyal

dil ke zaḳhmoñ kā phir hisāb kahāñ

dil dhaḌakte haiñ ab magar dil meñ

vo mahakte hue gulāb kahāñ

kyā pata vaqt ke añdheroñ meñ

chhap ga.e fan ke māhtāb kahāñ

vaqt Thahrā huā sā lagtā hai

ruk gayā aa ke inqalāb kahāñ

ai 'ra.īs' aarzū ke chehre par

ab vo aglī sī āb-o-tāb kahāñ

hum kahan aur dil-e-KHarab kahan

ai shab-e-gham tera jawab kahan

zindagi ke shuur se baDh kar

zindagi mein koi azab kahan

koi chehra ho ghaur se paDhiye

is se jamea koi kitab kahan

dard-o-gham ki udas aankhon mein

aarzu ke hasin KHwab kahan

aao apni sahar se puchh to len

chhoD aai hai aaftab kahan

ruh jab ho gai hai KHud ghayal

dil ke zaKHmon ka phir hisab kahan

dil dhaDakte hain ab magar dil mein

wo mahakte hue gulab kahan

kya pata waqt ke andheron mein

chhap gae fan ke mahtab kahan

waqt Thahra hua sa lagta hai

ruk gaya aa ke inqalab kahan

ai 'rais' aarzu ke chehre par

ab wo agli si aab-o-tab kahan