hum KHizan ki agar KHabar rakhte

ham ḳhizāñ kī agar ḳhabar rakhte

āshiyāne meñ phuul bhar rakhte

ham agar ishq meñ asar rakhte

amradoñ ko ġhulām kar rakhte

mere dil ko samajhte arsh-e-barīñ

ye sitāre agar nazar rakhte

kyā ḳhabar thī ki daam hai vo zulf

ham bhī faulād kā jigar rakhte

saath rañg-e-chaman ke uḌ jaate

aaj ham bhī jo bāl-o-par rakhte

raah detā jo us ke aane kī

zaaġh ke aage ham jigar rakhte

yaar kī donoñ āñkheñ qātil thiiñ

ik nazar ham kidhar kidhar rakhte

bhed apnā diyā na us dil ne

ham bhī kuchh apnī fikr kar rakhte

yahī shikva hai be-vafāoñ se

ham na marte jo ye ḳhabar rakhte

sañg-e-dil tujh ko jānte ham agar

sabr kī sil kaleje par rakhte

gūñdhte vo khajūr se juuTe aaj

haath apne jo kuchh hunar rakhte

āñkheñ ro ro ke kyuuñ sajāte ho

'bahr' aañsū nahīñ asar rakhte

hum KHizan ki agar KHabar rakhte

aashiyane mein phul bhar rakhte

hum agar ishq mein asar rakhte

amradon ko ghulam kar rakhte

mere dil ko samajhte arsh-e-barin

ye sitare agar nazar rakhte

kya KHabar thi ki dam hai wo zulf

hum bhi faulad ka jigar rakhte

sath rang-e-chaman ke uD jate

aaj hum bhi jo baal-o-par rakhte

rah deta jo us ke aane ki

zagh ke aage hum jigar rakhte

yar ki donon aankhen qatil thin

ek nazar hum kidhar kidhar rakhte

bhed apna diya na us dil ne

hum bhi kuchh apni fikr kar rakhte

yahi shikwa hai be-wafaon se

hum na marte jo ye KHabar rakhte

sang-e-dil tujh ko jaante hum agar

sabr ki sil kaleje par rakhte

gundhte wo khajur se juTe aaj

hath apne jo kuchh hunar rakhte

aankhen ro ro ke kyun sajate ho

'bahr' aansu nahin asar rakhte