hum kinara kiye kinaron se

ham kinārā kiye kināroñ se

khelā karte haiñ mañjdhāroñ se

ham guzarte haiñ khelte hañste

shola-zāroñ se ḳhārzāroñ se

naam paate haiñ nāseh-e-be-nām

ham se badnām bāda-ḳhvāroñ se

tuf ba-matlab-barārī-e-yārāñ

uf ye atvār ḳhāksāroñ se

jin ke dil meñ guloñ kī chāhat hai

pahle vo suraḳh-rū hoñ ḳhāroñ se

dil kī rāhoñ meñ bo liye kāñTe

kar ke ummīd gul-ezāroñ se

yuuñ hai jumbish meñ phuul kī Daalī

vo bulāte haiñ juuñ ishāroñ se

yuuñ to mah-vash hazār dekhe haiñ

tum judā ho magar hazāroñ se

bul-havas hai raqīb bātin meñ

taur zāhir meñ jāñ-nisāroñ se

ik fasāna ki thā dayār apnā

ik haqīqat ki be-dayāroñ se

tū ne ai dost saath kyā chhoḌā

dil laraztā hai ab sahāroñ se

garm bāzār hai mire fan kā

daad paatā huuñ naqd-kāroñ se

ruuTh jaa.eñ na vo kahīñ 'āmir'

sher paḌhiye na yuuñ ishāroñ se

hum kinara kiye kinaron se

khela karte hain manjdhaaron se

hum guzarte hain khelte hanste

shola-zaron se KHarzaron se

nam pate hain naseh-e-be-nam

hum se badnam baada-KHwaron se

tuf ba-matlab-barari-e-yaran

uf ye atwar KHaksaron se

jin ke dil mein gulon ki chahat hai

pahle wo suraKH-ru hon KHaron se

dil ki rahon mein bo liye kanTe

kar ke ummid gul-ezaron se

yun hai jumbish mein phul ki Dali

wo bulate hain jun ishaaron se

yun to mah-wash hazar dekhe hain

tum juda ho magar hazaron se

bul-hawas hai raqib baatin mein

taur zahir mein jaan-nisaron se

ek fasana ki tha dayar apna

ek haqiqat ki be-dayaron se

tu ne ai dost sath kya chhoDa

dil larazta hai ab sahaaron se

garm bazar hai mere fan ka

dad pata hun naqd-karon se

ruTh jaen na wo kahin 'amir'

sher paDhiye na yun ishaaron se