hum kisi ki bhi kabhi aankh ke tare na hue

ham kisī kī bhī kabhī aañkh ke taare na hue

jin ko chāhā thā bahut vo bhī hamāre na hue

Dūbte naav ko dekheñ mirī jin ko thī ye fikr

haa.e afsos vo dariyā ke kināre na hue

jo niko-kār the duniyā se vo uThte hī ga.e

the jo bad-kār vo allāh ko pyāre na hue

kaun sī sub.h vo ban kar na lab-e-bām aa.ī

kaun sī shaam ko khiḌkī se ishāre na hue

ye mohabbat to nahīñ ye hai mohabbat kā fareb

ham tumhāre na hue tum bhī hamāre na hue

ātish-e-dil kā bhī kuchh soz nihāñ thā is meñ

mere ashkoñ ke muqābil to sharāre na hue

'soz' ko yaad to guzre hue din kam haiñ magar

mahv dil se jo tire saath guzāre na hue

hum kisi ki bhi kabhi aankh ke tare na hue

jin ko chaha tha bahut wo bhi hamare na hue

Dubte naw ko dekhen meri jin ko thi ye fikr

hae afsos wo dariya ke kinare na hue

jo niko-kar the duniya se wo uThte hi gae

the jo bad-kar wo allah ko pyare na hue

kaun si subh wo ban kar na lab-e-baam aai

kaun si sham ko khiDki se ishaare na hue

ye mohabbat to nahin ye hai mohabbat ka fareb

hum tumhaare na hue tum bhi hamare na hue

aatish-e-dil ka bhi kuchh soz nihan tha is mein

mere ashkon ke muqabil to sharare na hue

'soz' ko yaad to guzre hue din kam hain magar

mahw dil se jo tere sath guzare na hue