hum kisi saya-e-diwar mein aa baiThe hain

ham kisī sāya-e-dīvār meñ aa baiThe haiñ

yā kahīñ shaam ke āsār meñ aa baiThe haiñ

ham ki juz apne sivā auroñ se vāqif hī nahīñ

ḳhud se uktā.e to do-chār meñ aa baiThe haiñ

ham ko bhātī na thī ḳhushbū-e-chaman to uTh kar

ghar ke gul-dān kī mahkār meñ aa baiThe haiñ

ye ajab log haiñ jiine kī tamannā le kar

sub.h hote hī saf-e-dār meñ aa baiThe haiñ

chhoḌ kar apne Thikānoñ ko chaman meñ ye parind

jaane kyuuñ vādī-e-pur-ḳhār meñ aa baiThe haiñ

tū na ho to koī tujh sā hī nazar aa.e 'shahāb'

ham jahāñ hasrat-e-dīdār meñ aa baiThe haiñ

hum kisi saya-e-diwar mein aa baiThe hain

ya kahin sham ke aasar mein aa baiThe hain

hum ki juz apne siwa auron se waqif hi nahin

KHud se uktae to do-chaar mein aa baiThe hain

hum ko bhati na thi KHushbu-e-chaman to uTh kar

ghar ke gul-dan ki mahkar mein aa baiThe hain

ye ajab log hain jine ki tamanna le kar

subh hote hi saf-e-dar mein aa baiThe hain

chhoD kar apne Thikanon ko chaman mein ye parind

jaane kyun wadi-e-pur-KHar mein aa baiThe hain

tu na ho to koi tujh sa hi nazar aae 'shahab'

hum jahan hasrat-e-didar mein aa baiThe hain