hum ko dikha dikha ke ghairon ke itr malna

ham ko dikhā dikhā ke ġhairoñ ke itr malnā

aatā hai ḳhuub tum ko chhātī pe muuñg dalnā

mahshar bapā kiyā hai raftār ne tumhārī

is chaal ke tasadduq ye bhī hai koī chalnā

ġhairoñ ke ghar to shab ko jaate ho bārhā tum

bhūle se mere ghar bhī ik roz aa nikalnā

haT kī kuchh intihā hai zid kī bhī koī had hai

ye baat baat par to achchhā nahīñ machalnā

jaltā hai ġhair ham se to kyā ḳhatā hamārī

tum ye samajh lo us kī taqdīr meñ hai jalnā

jab tak haiñ tere dar par dil-bastagī sī hai kuchh

ye āstāñ jo chhūTā mushkil hai jī bahalnā

dekho 'hafīz' apne jī kī jo ḳhair chāho

baste jidhar hasīñ hoñ vo rāsta na chalnā

hum ko dikha dikha ke ghairon ke itr malna

aata hai KHub tum ko chhati pe mung dalna

mahshar bapa kiya hai raftar ne tumhaari

is chaal ke tasadduq ye bhi hai koi chalna

ghairon ke ghar to shab ko jate ho barha tum

bhule se mere ghar bhi ek roz aa nikalna

haT ki kuchh intiha hai zid ki bhi koi had hai

ye baat baat par to achchha nahin machalna

jalta hai ghair hum se to kya KHata hamari

tum ye samajh lo us ki taqdir mein hai jalna

jab tak hain tere dar par dil-bastagi si hai kuchh

ye aastan jo chhuTa mushkil hai ji bahalna

dekho 'hafiz' apne ji ki jo KHair chaho

baste jidhar hasin hon wo rasta na chalna