ham ko yād-e-yār meñ hāsil jo tanhā.ī huī
TuuT kar barsī ghaTā jo dil pe thī chhā.ī huī
zindagī jab se tirī merī shanāsā.ī huī
tū tamāshā ban ga.ī aur maiñ tamāshā.ī huī
ā.eñge sāvan meñ sājan le ke aa.ī hai naved
be-vaj.h phirtī nahīñ purvā.ī baurā.ī huī
aap itnā to samajhne kī kabhī zahmat kareñ
aap kī bhī merī rusvā.ī se rusvā.ī huī
jaag uTThe aaj lo phir ishq ke so.e nasīb
zindagī phir aaj us but kī tamannā.ī huī
chhup ga.e haiñ māh-o-anjum har taraf hai ḳhāmushī
aa bhī jā ai yād-e-rafta ab to tanhā.ī huī
is qadar mazbūt hai ā.īn-e-ulfat kī giraft
kah nahīñ paatī zabāñ par baat bhī aa.ī huī
raat aa.e to na jaane kis tarah guzre 'nazar'
hai tabī.at shaam hī se aaj ghabrā.ī huī
hum ko yaad-e-yar mein hasil jo tanhai hui
TuT kar barsi ghaTa jo dil pe thi chhai hui
zindagi jab se teri meri shanasai hui
tu tamasha ban gai aur main tamashai hui
aaenge sawan mein sajan le ke aai hai nawed
be-wajh phirti nahin purwai baurai hui
aap itna to samajhne ki kabhi zahmat karen
aap ki bhi meri ruswai se ruswai hui
jag uTThe aaj lo phir ishq ke soe nasib
zindagi phir aaj us but ki tamannai hui
chhup gae hain mah-o-anjum har taraf hai KHamushi
aa bhi ja ai yaad-e-rafta ab to tanhai hui
is qadar mazbut hai aain-e-ulfat ki giraft
kah nahin pati zaban par baat bhi aai hui
raat aae to na jaane kis tarah guzre 'nazar'
hai tabiat sham hi se aaj ghabrai hui
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.