hum mund ke palken kabhi roya nahin karte

ham muuñd ke palkeñ kabhī royā nahīñ karte

āñkhoñ meñ jo aañsū ho to soyā nahīñ karte

har talḳh haqīqat ko uḌāte haiñ hañsī meñ

ham log kisī baat pe royā nahīñ karte

ik umr guzārī hai to ma.alūm huā hai

kashtī ko kināre pe Duboyā nahīñ karte

āñkhoñ se jo jhaḌte haiñ vo aañsū hī bahut haiñ

kaliyoñ kā to ham haar piroyā nahīñ karte

zebā.ish-e-dāmān-e-mohabbat hai isī se

lag jaa.e agar daaġh to dhoyā nahīñ karte

iz.hār-e-mohabbat kabhī us dushman-e-jāñ se

is tarah se karte haiñ ki goyā nahīñ karte

kho kar tumheñ ehsās huā mujh ko ye 'shahnāz'

yuuñ pā ke kisī dost ko khoyā nahīñ karte

hum mund ke palken kabhi roya nahin karte

aankhon mein jo aansu ho to soya nahin karte

har talKH haqiqat ko uDate hain hansi mein

hum log kisi baat pe roya nahin karte

ek umr guzari hai to malum hua hai

kashti ko kinare pe Duboya nahin karte

aankhon se jo jhaDte hain wo aansu hi bahut hain

kaliyon ka to hum haar piroya nahin karte

zebaish-e-daman-e-mohabbat hai isi se

lag jae agar dagh to dhoya nahin karte

izhaar-e-mohabbat kabhi us dushman-e-jaan se

is tarah se karte hain ki goya nahin karte

kho kar tumhein ehsas hua mujh ko ye 'shahnaz'

yun pa ke kisi dost ko khoya nahin karte