hum na honge to hamein yaad karoge yaro

ham na hoñge to hameñ yaad karoge yaaro

tazkire hoñge yahī jab bhī miloge yaaro

ham ne rūdād-e-vafā ḳhud se murattab kī hai

dāstāñ phir ye kabhī sun na sakoge yaaro

ham na hoñge to kise pāoge dil kā mahram

ham na hoñge to ye dukh kis se kahoge yaaro

mahfileñ yūñhī raheñgī yūñhī yāroñ ke hujūm

lekin ik baat jise phir na sunoge yaaro

ham se zinda hai rah-o-rasm-e-mohabbat ab tak

us ko jaañ de ke kahāñ zinda rakhoge yaaro

ham ne har baar havādis kī kalā.ī moḌī

tum unheñ kis tarah maġhlūb karoge yaaro

zikr hogā lab-e-ayyām pe aksar apnā

tum hameñ mus.haf-e-ālam meñ paḌhoge yaaro

vaqt pūjegā hameñ vaqt hameñ DhūñDegā

aur tum vaqt ke ham-rāh chaloge yaaro

hamīñ tārīḳh-e-zamāna ke murattab haiñ 'ḳhalīq'

hameñ tārīḳh meñ ik roz kahoge yaaro

hum na honge to hamein yaad karoge yaro

tazkire honge yahi jab bhi miloge yaro

hum ne rudad-e-wafa KHud se murattab ki hai

dastan phir ye kabhi sun na sakoge yaro

hum na honge to kise paoge dil ka mahram

hum na honge to ye dukh kis se kahoge yaro

mahfilen yunhi rahengi yunhi yaron ke hujum

lekin ek baat jise phir na sunoge yaro

hum se zinda hai rah-o-rasm-e-mohabbat ab tak

us ko jaan de ke kahan zinda rakhoge yaro

hum ne har bar hawadis ki kalai moDi

tum unhen kis tarah maghlub karoge yaro

zikr hoga lab-e-ayyam pe aksar apna

tum hamein mushaf-e-alam mein paDhoge yaro

waqt pujega hamein waqt hamein DhunDega

aur tum waqt ke ham-rah chaloge yaro

hamin tariKH-e-zamana ke murattab hain 'KHaliq'

hamein tariKH mein ek roz kahoge yaro