ham-nafas hai na ham-nashin koi

ham-nafas hai na ham-nashīñ koī

mahram-e-rāz-e-dil nahīñ koī

merī rūdād pūchhne vaale

mujh sā andoh-gīñ nahīñ koī

zaḳhm dil ne jahāñ-jahāñ khaa.e

yaad aaya vahīñ vahīñ koī

DhūñDhtā hai tamāzat-e-ġham meñ

sāya-e-zulf-e-ambarīñ koī

dil hai phir mubtalā-e-vahm-o-gumāñ

phir dilā.e mujhe yaqīñ koī

lā-makāñ hai fareb-e-fikr-o-nazar

ḳhalvat-e-dil meñ hai makīñ koī

baat dil kī zabāñ pe kyā aa.e

dil meñ baiThā hai nukta-chīñ koī

ashk-e-hasrat sameTne ko 'tufail'

mil hī jā.egī āstīñ koī

ham-nafas hai na ham-nashin koi

mahram-e-raaz-e-dil nahin koi

meri rudad puchhne wale

mujh sa andoh-gin nahin koi

zaKHm dil ne jahan-jahan khae

yaad aaya wahin wahin koi

DhunDhta hai tamazat-e-gham mein

saya-e-zulf-e-ambarin koi

dil hai phir mubtala-e-wahm-o-guman

phir dilae mujhe yaqin koi

la-makan hai fareb-e-fikr-o-nazar

KHalwat-e-dil mein hai makin koi

baat dil ki zaban pe kya aae

dil mein baiTha hai nukta-chin koi

ashk-e-hasrat sameTne ko 'tufail'

mil hi jaegi aastin koi