ham-nafaso ujaD gain mehr-o-wafa ki bastiyan

ham-nafaso ujaḌ ga.iiñ mehr-o-vafā kī bastiyāñ

pūchh rahe haiñ ahl-e-mehr-o-vafā ko kyā huā

ishq hai be-guzār kyuuñ husn hai be-niyāz kyuuñ

merī vafā kahāñ ga.ī un kī jafā ko kyā huā

ye to bajā ki ab vo kaif jām-e-sharāb meñ nahīñ

sāqī-e-mai ke ġhamza-e-hosh-rubā ko kyā huā

ab nahīñ jannat mashām-e-kūcha-e-yār kī shamīm

nik.hat-e-zulf kyā huī bād-e-sabā ko kyā huā

tham gayā daura-e-hayāt ruk ga.ī nabz-e-kā.enāt

ishq-o-junūñ kī garmī-e-hamhama-zā ko kyā huā

dasht-e-junūñ meñ ho ga.ī manzil-e-yār be-surāġh

qāfila kis taraf gayā bāñg-e-darā ko kyā huā

nāla-e-shab hai nā-rasā āh-e-sahar hai be-asar

merā ḳhudā kahāñ gayā mere ḳhudā ko kyā huā

ham-nafaso ujaD gain mehr-o-wafa ki bastiyan

puchh rahe hain ahl-e-mehr-o-wafa ko kya hua

ishq hai be-guzar kyun husn hai be-niyaz kyun

meri wafa kahan gai un ki jafa ko kya hua

ye to baja ki ab wo kaif jam-e-sharab mein nahin

saqi-e-mai ke ghamza-e-hosh-ruba ko kya hua

ab nahin jannat masham-e-kucha-e-yar ki shamim

nikhat-e-zulf kya hui baad-e-saba ko kya hua

tham gaya daura-e-hayat ruk gai nabz-e-kaenat

ishq-o-junun ki garmi-e-hamhama-za ko kya hua

dasht-e-junun mein ho gai manzil-e-yar be-suragh

qafila kis taraf gaya bang-e-dara ko kya hua

nala-e-shab hai na-rasa aah-e-sahar hai be-asar

mera KHuda kahan gaya mere KHuda ko kya hua