ham-nashin kuchh to ilaj-e-dil-e-shaida kar de

ham-nashīñ kuchh to ilāj-e-dil-e-shaidā kar de

zindagī ko na mirī nazr-e-tamāshā kar de

jām-e-ulfat se mire lab ko shanāsā kar de

vaqf auroñ ke liye vus’at-e-dariyā kar de

āstānoñ ko to be-shak na kamī hai lekin

sajda-rezī kā junūñ tujh ko na rusvā kar de

dekh leñ apnī bhī āñkhoñ se vo anjām-e-sitam

kor-chashmoñ ko 'atā dīda-e-bīnā kar de

rakhiye ehsān na is chāragarī kā ham par

dil ke zaḳhmoñ ko jo kuchh aur bhī gahrā kar de

bhiik meñ māñge ujāloñ pe guzārā kab tak

is se behtar to yahī hai ki añdherā kar de

zahr kā jaam sahī bāda-e-rangīñ na sahī

tū agar chāhe to is ko bhī gavārā kar de

zard chehroñ pe bhī khil jaa.e gulistān-e-shabāb

terī duzdīda-nigāhī jo ishāra kar de

baar hai tujh pe jo zanjīr-e-ta'alluq ai dost

beḌiyāñ kaaT ke is qaid ko halkā kar de

garmī-e-fan se hunar-mandī-e-dast-e-fankār

saḳht patthar ko agar chāhe to shīsha kar de

miT hī jā.egī shab-e-ġham kī siyāhī 'bahzād'

dil ko raushan jo charāġh-e-ruḳh-e-zebā kar de

ham-nashin kuchh to ilaj-e-dil-e-shaida kar de

zindagi ko na meri nazr-e-tamasha kar de

jam-e-ulfat se mere lab ko shanasa kar de

waqf auron ke liye wus’at-e-dariya kar de

aastanon ko to be-shak na kami hai lekin

sajda-rezi ka junun tujh ko na ruswa kar de

dekh len apni bhi aankhon se wo anjam-e-sitam

kor-chashmon ko 'ata dida-e-bina kar de

rakhiye ehsan na is chaaragari ka hum par

dil ke zaKHmon ko jo kuchh aur bhi gahra kar de

bhik mein mange ujalon pe guzara kab tak

is se behtar to yahi hai ki andhera kar de

zahr ka jam sahi baada-e-rangin na sahi

tu agar chahe to is ko bhi gawara kar de

zard chehron pe bhi khil jae gulistan-e-shabab

teri duzdida-nigahi jo ishaara kar de

bar hai tujh pe jo zanjir-e-ta'alluq ai dost

beDiyan kaT ke is qaid ko halka kar de

garmi-e-fan se hunar-mandi-e-dast-e-fankar

saKHt patthar ko agar chahe to shisha kar de

miT hi jaegi shab-e-gham ki siyahi 'bahzad'

dil ko raushan jo charagh-e-ruKH-e-zeba kar de