ham-nashino kuchh nahin rakkha yahan par kuchh nahin

ham-nashīno kuchh nahīñ rakkhā yahāñ par kuchh nahīñ

chhoḌ do is kī havas duniyā ke andar kuchh nahīñ

dar khulā hī rahne do ghar se nikalte vaqt tum

kuchh agar hai to tumhārī zaat hai ghar kuchh nahīñ

baa.eñ meñ sūraj rahe aur chāñd dahne haath meñ

dil agar raushan nahīñ to shobada-gar kuchh nahīñ

maiñ sarāpā raat bhī huuñ maiñ sarāpā sub.h bhī

mujh se kam-tar kuchh nahīñ aur mujh se bartar kuchh nahīñ

ik chamak āñkhoñ meñ aa jaatī hai us ko dekh kar

varna dil to muttafiq hai aap se, zar kuchh nahīñ

aa.ine se ro ke pūchhā jab kabhī maiñ kaun huuñ

ā.īna bolā vahīñ fauran palaT kar kuchh nahīñ

vaqt ne sab duur kar dī haiñ mirī ḳhush-fahmiyāñ

ye mirā muḳhlis hai mujh ko is se baḌh kar kuchh nahīñ

ham-nashino kuchh nahin rakkha yahan par kuchh nahin

chhoD do is ki hawas duniya ke andar kuchh nahin

dar khula hi rahne do ghar se nikalte waqt tum

kuchh agar hai to tumhaari zat hai ghar kuchh nahin

baen mein suraj rahe aur chand dahne hath mein

dil agar raushan nahin to shobada-gar kuchh nahin

main sarapa raat bhi hun main sarapa subh bhi

mujh se kam-tar kuchh nahin aur mujh se bartar kuchh nahin

ek chamak aankhon mein aa jati hai us ko dekh kar

warna dil to muttafiq hai aap se, zar kuchh nahin

aaine se ro ke puchha jab kabhi main kaun hun

aaina bola wahin fauran palaT kar kuchh nahin

waqt ne sab dur kar di hain meri KHush-fahmiyan

ye mera muKHlis hai mujh ko is se baDh kar kuchh nahin