humne jis roz pi nahin hoti

ham ne jis roz pī nahīñ hotī

zindagī zindagī nahīñ hotī

raat ko ḳhvāb dekhne ke liye

aañkh meñ niiñd hī nahīñ hotī

sub.h jis vaqt shahr aatī hai

koī khiḌkī khulī nahīñ hotī

dil to hotā hai baar baar javān

'umr kī vāpsī nahīñ hotī

ḳhushī hotī hai aaj bhī lekin

kuchh ziyāda ḳhushī nahīñ hotī

uThte jaate haiñ log duniyā se

aur koī kamī nahīñ hotī

kaun sā din nayā nahīñ hotā

kaun sī shab na.ī nahīñ hotī

be piye koī kyā ġhazal chheḌe

koft meñ shā'irī nahīñ hotī

ham bhī hote haiñ go udaas 'sha'ūr'

aisī afsurdagī nahīñ hotī

hum ne jis roz pi nahin hoti

zindagi zindagi nahin hoti

raat ko KHwab dekhne ke liye

aankh mein nind hi nahin hoti

subh jis waqt shahr aati hai

koi khiDki khuli nahin hoti

dil to hota hai bar bar jawan

'umr ki wapsi nahin hoti

KHushi hoti hai aaj bhi lekin

kuchh ziyaada KHushi nahin hoti

uThte jate hain log duniya se

aur koi kami nahin hoti

kaun sa din naya nahin hota

kaun si shab nai nahin hoti

be piye koi kya ghazal chheDe

koft mein sha'iri nahin hoti

hum bhi hote hain go udas 'sha'ur'

aisi afsurdagi nahin hoti