humne junun-e-ishq mein kufr zara nahin kiya

ham ne junūn-e-ishq meñ kufr zarā nahīñ kiyā

us se mohabbateñ to kiiñ us ko ḳhudā nahīñ kiyā

umr huī ki dekh kar niiñd uchaT ga.ī thī haañ

aañkh ne phir kabhī raqam ḳhvāb nayā nahīñ kiyā

tujh se kahā thā ḳhushbueñ us ke badan kī lā.iyo

merā ye kaam aaj tak tū ne sabā nahīñ kiyā

ham sā bhī is jahān meñ hogā na koī yarġhamāl

qaid se us kī aaj tak ḳhud ko rihā nahīñ kiyā

kaise kahūñ ki dostī tum ne nibāhī dosto

tum ne kured kar koī zaḳhm harā nahīñ kiyā

dekh to bandagī meñ bhī kaisā anā kā paas thā

laakh dukhoñ ke bāvajūd koī gila nahīñ kiyā

soch rakhā thā ishq se rañg bhareñge sher meñ

dil ne magar nahīñ kyā ishq 'ziyā' nahīñ kiyā

hum ne junun-e-ishq mein kufr zara nahin kiya

us se mohabbaten to kin us ko KHuda nahin kiya

umr hui ki dekh kar nind uchaT gai thi han

aankh ne phir kabhi raqam KHwab naya nahin kiya

tujh se kaha tha KHushbuen us ke badan ki laiyo

mera ye kaam aaj tak tu ne saba nahin kiya

hum sa bhi is jahan mein hoga na koi yarghamal

qaid se us ki aaj tak KHud ko riha nahin kiya

kaise kahun ki dosti tum ne nibahi dosto

tum ne kured kar koi zaKHm hara nahin kiya

dekh to bandagi mein bhi kaisa ana ka pas tha

lakh dukhon ke bawajud koi gila nahin kiya

soch rakha tha ishq se rang bharenge sher mein

dil ne magar nahin kya ishq 'ziya' nahin kiya