humne mana ki jahan hum the gulistan to na tha

ham ne maanā ki jahāñ ham the gulistāñ to na thā

magar aisā bhī vahāñ kūcha-e-vīrāñ to na thā

apnā saaya thā faqat ziist kā sāmāñ to na thā

saath chaltā thā jo saaya mire insāñ to na thā

ḳhār-o-ḳhas gul se nahīñ kam tire vīrānoñ ke

dasht meñ varna kahīñ koī gulistāñ to na thā

zarra zarra hai tirī ḳhaak kā mahbūb mujhe

us kā ehsās mujhe yaañ hai magar vaañ to na thā

mujh pe ilzām lagāte ho junūñ-ḳhezī kā

chāk-dāmāñ thā magar chāk-garebāñ to na thā

kaun samjhegā use us ko zarūrat kyā hai

kabhī mohtāj-e-bayāñ qissa-e-'sultāñ' to na thā

hum ne mana ki jahan hum the gulistan to na tha

magar aisa bhi wahan kucha-e-viran to na tha

apna saya tha faqat zist ka saman to na tha

sath chalta tha jo saya mere insan to na tha

KHar-o-KHas gul se nahin kam tere viranon ke

dasht mein warna kahin koi gulistan to na tha

zarra zarra hai teri KHak ka mahbub mujhe

us ka ehsas mujhe yan hai magar wan to na tha

mujh pe ilzam lagate ho junun-KHezi ka

chaak-daman tha magar chaak-gareban to na tha

kaun samjhega use us ko zarurat kya hai

kabhi mohtaj-e-bayan qissa-e-'sultan' to na tha