humne maiKHane ki taqdis bacha li hoti

ham ne maiḳhāne kī taqdīs bachā lī hotī

koī botal to yahāñ ḳhuun se ḳhālī hotī

is kī buniyād agar zohd ne Daalī hotī

diin kī tarah ye duniyā bhī ḳhayālī hotī

anjuman dāġh-e-jigar kī mutahammil na huī

kaash ham ne bhī koī sham.a jalā lī hotī

sach to ye hai kahā gar jurm na sābit hotā

ham ne ḳhud maañg ke jiine kī sazā lī hotī

aaj is moḌ pe ham haiñ ki agar bas chaltā

lauT jaane kī koī raah nikālī hotī

tum ne qānūn meñ tarmīm kī zahmat kyuuñ kī

ham ne ḳhud qaid kī mī.ād baḌhā lī hotī

vus.at-e-shauq ne rakkhā na kahīñ kā ham ko

varna har dil meñ jagah apnī banā lī hotī

hum ne maiKHane ki taqdis bacha li hoti

koi botal to yahan KHun se KHali hoti

is ki buniyaad agar zohd ne Dali hoti

din ki tarah ye duniya bhi KHayali hoti

anjuman dagh-e-jigar ki mutahammil na hui

kash hum ne bhi koi shama jala li hoti

sach to ye hai kaha gar jurm na sabit hota

hum ne KHud mang ke jine ki saza li hoti

aaj is moD pe hum hain ki agar bas chalta

lauT jaane ki koi rah nikali hoti

tum ne qanun mein tarmim ki zahmat kyun ki

hum ne KHud qaid ki miad baDha li hoti

wusat-e-shauq ne rakkha na kahin ka hum ko

warna har dil mein jagah apni bana li hoti