humne parind-e-wasl ke par kaT Dale hain

ham ne parind-e-vasl ke par kaaT Daale haiñ

jazbāt uThā rahe the jo sar kaaT Daale haiñ

likhnī thī ham ko ek na.ī dāstān-e-hijr

sab vāqi.āt-e-dīda-e-tar kaaT Daale haiñ

baiThī rahe usī qafas-e-unsarī meñ ab

teġh-e-badan ne ruuh ke par kaaT Daale haiñ

ab sher zor-e-be-hunarī se likheñge ham

duniyā ne saare dast-e-hunar kaaT Daale haiñ

jī chāhtā hai dast-e-taraqqī ko kaaT duuñ

jis ne hamāre saare shajar kaaT Daale haiñ

naqqād-e-ḳhushk-zauq ke ghar ho rahā hai jashn

aaj us ne saare misra-e-tar kaaT Daale haiñ

sham.eñ mukāshfāt-e-badan kī jalānī thiiñ

sab ma.arifat ke tār-e-nazar kaaT Daale haiñ

hum ne parind-e-wasl ke par kaT Dale hain

jazbaat uTha rahe the jo sar kaT Dale hain

likhni thi hum ko ek nai dastan-e-hijr

sab waqiat-e-dida-e-tar kaT Dale hain

baiThi rahe usi qafas-e-unsari mein ab

tegh-e-badan ne ruh ke par kaT Dale hain

ab sher zor-e-be-hunari se likhenge hum

duniya ne sare dast-e-hunar kaT Dale hain

ji chahta hai dast-e-taraqqi ko kaT dun

jis ne hamare sare shajar kaT Dale hain

naqqad-e-KHushk-zauq ke ghar ho raha hai jashn

aaj us ne sare misra-e-tar kaT Dale hain

shamen mukashfat-e-badan ki jalani thin

sab marifat ke tar-e-nazar kaT Dale hain