humne phulon ko jo dekha lab-o-ruKHsar ke baad

ham ne phūloñ ko jo dekhā lab-o-ruḳhsār ke ba.ad

phuul dekhe na ga.e husn-e-ruḳh-e-yār ke ba.ad

kaam nazroñ se liyā abru-e-ḳhamdār ke ba.ad

tiir maare mujhe us shoḳh ne talvār ke ba.ad

jis pe ho jaa.eñ fidā koī bhī aisā na milā

saikḌoñ dekhe hasīñ aap ke dīdār ke ba.ad

dilrubā.ī kī adā yuuñ na kisī ne paa.ī

mere sarkār se pahle mire sarkār ke ba.ad

zindagī maut se kuchh kam na thī ai jān-e-hayāt

tere iqrār se pahle tire inkār ke ba.ad

dil-o-jāñ kar ke fidā un ko banāyā apnā

ishq ke khel meñ jiit apnī huī haar ke ba.ad

chain phir aur kahīñ pā na sake ai 'purnam'

ham zamāne meñ phire kūcha-e-dildār ke ba.ad

hum ne phulon ko jo dekha lab-o-ruKHsar ke baad

phul dekhe na gae husn-e-ruKH-e-yar ke baad

kaam nazron se liya abru-e-KHamdar ke baad

tir mare mujhe us shoKH ne talwar ke baad

jis pe ho jaen fida koi bhi aisa na mila

saikDon dekhe hasin aap ke didar ke baad

dilrubai ki ada yun na kisi ne pai

mere sarkar se pahle mere sarkar ke baad

zindagi maut se kuchh kam na thi ai jaan-e-hayat

tere iqrar se pahle tere inkar ke baad

dil-o-jaan kar ke fida un ko banaya apna

ishq ke khel mein jit apni hui haar ke baad

chain phir aur kahin pa na sake ai 'purnam'

hum zamane mein phire kucha-e-dildar ke baad