humne suna hai saz-e-saba aur kuchh suna

ham ne sunā hai sāz-e-sabā aur kuchh sunā

nauha hai ye bahār hī kā aur kuchh sunā

ham ne sunā hai duur bayābāñ se lauT kar

peḌoñ pe hāñptī hai havā aur kuchh sunā

ham ne sunā hai tere faqīroñ meñ ik faqīr

letā hai saañs sho'la-numā aur kuchh sunā

ham ne sunā hai ham jo garebān phāḌte

taḌ taḌ taḌaḳh barastī ghaTā aur kuchh sunā

ham ne sunā hai raat ko kuttoñ ke ḳhauf se

tū ghūmtā hai le ke 'asā aur kuchh sunā

ham ne sunā hai ab bhī tire hoñT dekh kar

gul kholtā hai band-e-qabā aur kuchh sunā

ham ne sunā hai bajte haiñ paañv ke nīche Dhol

aur nāchtī hai sar pe qazā aur kuchh sunā

ham ne sunā hai chāñd kī jhāñjan jhanak uThī

aur ek barg chauñk paḌā aur kuchh sunā

hum ne suna hai saz-e-saba aur kuchh suna

nauha hai ye bahaar hi ka aur kuchh suna

hum ne suna hai dur bayaban se lauT kar

peDon pe hanpti hai hawa aur kuchh suna

hum ne suna hai tere faqiron mein ek faqir

leta hai sans sho'la-numa aur kuchh suna

hum ne suna hai hum jo gareban phaDte

taD taD taDaKH barasti ghaTa aur kuchh suna

hum ne suna hai raat ko kutton ke KHauf se

tu ghumta hai le ke 'asa aur kuchh suna

hum ne suna hai ab bhi tere honT dekh kar

gul kholta hai band-e-qaba aur kuchh suna

hum ne suna hai bajte hain panw ke niche Dhol

aur nachti hai sar pe qaza aur kuchh suna

hum ne suna hai chand ki jhanjan jhanak uThi

aur ek barg chaunk paDa aur kuchh suna