humne to justuju ko bhi hai muddaa kiya

ham ne to justujū ko bhī hai mudda.ā kiyā

ya.anī ki dil ke dard ko husn-e-navā kiyā

har jumbish-e-nazar meñ nihāñ tere inqalāb

mujh ko ghaTā diyā kabhī mujh ko sivā kiyā

ai kaash terā husn hī asl-e-hayāt ho

terī nazar se ham ne haqīqat ko vā kiyā

us dashna-e-nazar kā bhalā aur kyā javāb

hamdam meñ dil ke chaak hī baiThā siyā kiyā

us rahguzar se ab vo na guzregā ai nadīm

kuchh maiñ ne kah diyā thā magar us ne kyā kiyā

maiñ us se sarḳhushī meñ vahī baat kah gayā

kitnā burā kiyā are kitnā burā kiyā

kyā kyā jatan kiye na mohabbat meñ ai nadīm

kyā pūchhte ho kyā na kiyā aur kyā kiyā

ab bāz-gasht kī koī sūrat nikal sake

yuuñ to tire baġhair bhī ye dil jiyā kiyā

ik chūmtī huī sī nazar Daal kar

'mas.ūd' tum ne ek sanam ko ḳhudā kiyā

hum ne to justuju ko bhi hai muddaa kiya

yani ki dil ke dard ko husn-e-nawa kiya

har jumbish-e-nazar mein nihan tere inqalab

mujh ko ghaTa diya kabhi mujh ko siwa kiya

ai kash tera husn hi asl-e-hayat ho

teri nazar se hum ne haqiqat ko wa kiya

us dashna-e-nazar ka bhala aur kya jawab

hamdam mein dil ke chaak hi baiTha siya kiya

us rahguzar se ab wo na guzrega ai nadim

kuchh main ne kah diya tha magar us ne kya kiya

main us se sarKHushi mein wahi baat kah gaya

kitna bura kiya are kitna bura kiya

kya kya jatan kiye na mohabbat mein ai nadim

kya puchhte ho kya na kiya aur kya kiya

ab baz-gasht ki koi surat nikal sake

yun to tere baghair bhi ye dil jiya kiya

ek chumti hui si nazar Dal kar

'masud' tum ne ek sanam ko KHuda kiya