hum qatl ho gae nahin tujhko KHabar hanuz

ham qatl ho ga.e nahīñ tujh ko ḳhabar hanūz

bāñdhe phire hai ham pe miyāñ tū kamar hanūz

sau sau tarah ke vasl ne marham rakhe vale

zaḳhm-e-firāq haiñ mire vaise hī tar hanūz

kholī thī ḳhvāb-e-nāz se kis ne ye uTh ke zulf

laatī hai bū-e-nāz nasīm-e-sahar hanūz

va.adoñ pe tere kaam bhī merā huā tamām

bāteñ hī tū banāyā kiyā yaar par hanūz

jo duudh kā jalā ho piye chhāchh phūñk phūñk

huuñ vasl meñ pe hijr se hai mujh ko Dar hanūz

bhūle se tū ne pyaar kī ik din kahī jo baat

rotā huuñ dil hī dil meñ use yaad kar hanūz

ujḌe hazār shahr 'hasan' aur phir base

ābād par huā na ye dil kā nagar hanūz

hum qatl ho gae nahin tujh ko KHabar hanuz

bandhe phire hai hum pe miyan tu kamar hanuz

sau sau tarah ke wasl ne marham rakhe wale

zaKHm-e-firaq hain mere waise hi tar hanuz

kholi thi KHwab-e-naz se kis ne ye uTh ke zulf

lati hai bu-e-naz nasim-e-sahar hanuz

wadon pe tere kaam bhi mera hua tamam

baaten hi tu banaya kiya yar par hanuz

jo dudh ka jala ho piye chhachh phunk phunk

hun wasl mein pe hijr se hai mujh ko Dar hanuz

bhule se tu ne pyar ki ek din kahi jo baat

rota hun dil hi dil mein use yaad kar hanuz

ujDe hazar shahr 'hasan' aur phir base

aabaad par hua na ye dil ka nagar hanuz