humse aashufta-mizajon ka pata puchhti hai

ham se āshufta-mizājoñ kā patā pūchhtī hai

kitne baaqī haiñ diye roz havā pūchhtī hai

roz kaliyoñ ko khilāte hue kartī hai savāl

kaisī dāman kī mahak hai ye sabā pūchhtī hai

kis jagah tujh ko Thaharnā hai tamannā-e-jahāñ

laḌkhaḌāte hue ye laġhzish-e-pā pūchhtī hai

tishnagī aur hai sahrā-e-tamannā kitnī

jo barastī nahīñ khul ke vo ghaTā pūchhtī hai

raqs karte hue zarroñ se maiñ suntī huuñ sadā

gard uḌte hue anjām mirā pūchhtī hai

mehrbāñ gardish-e-hālāt hai utnī mujh par

koī pūchhe ki na pūchhe ye sabā pūchhtī hai

hum se aashufta-mizajon ka pata puchhti hai

kitne baqi hain diye roz hawa puchhti hai

roz kaliyon ko khilate hue karti hai sawal

kaisi daman ki mahak hai ye saba puchhti hai

kis jagah tujh ko Thaharna hai tamanna-e-jahan

laDkhaDate hue ye laghzish-e-pa puchhti hai

tishnagi aur hai sahra-e-tamanna kitni

jo barasti nahin khul ke wo ghaTa puchhti hai

raqs karte hue zarron se main sunti hun sada

gard uDte hue anjam mera puchhti hai

mehrban gardish-e-haalat hai utni mujh par

koi puchhe ki na puchhe ye saba puchhti hai