humse bhi gahe gahe mulaqat chahiye

ham se bhī gaahe gaahe mulāqāt chāhiye

insān haiñ sabhī to musāvāt chāhiye

achchhā chalo ḳhudā na sahī un ko kyā huā

āḳhir koī to qāzi-e-hājāt chāhiye

hai āqibat ḳharāb to duniyā hī Thiik ho

koī to sūrat-e-guzar-auqāt chāhiye

jaane palak jhapakne meñ kyā gul khilā.e vaqt

har dam nazar ba-sūrat-e-hālāt chāhiye

aa.egī ham ko raas na yak-rañgi-e-ḳhalā

ahl-e-zamīñ haiñ ham hameñ din raat chāhiye

vā kar diye haiñ ilm ne dariyā-e-ma.arifat

andhoñ ko ab bhī kashf o karāmāt chāhiye

jab qais kī kahānī ab anjum kī dāstāñ

duniyā ko dil lagī ke liye baat chāhiye

hum se bhi gahe gahe mulaqat chahiye

insan hain sabhi to musawat chahiye

achchha chalo KHuda na sahi un ko kya hua

aaKHir koi to qazi-e-hajat chahiye

hai aaqibat KHarab to duniya hi Thik ho

koi to surat-e-guzar-auqat chahiye

jaane palak jhapakne mein kya gul khilae waqt

har dam nazar ba-surat-e-haalat chahiye

aaegi hum ko ras na yak-rangi-e-KHala

ahl-e-zamin hain hum hamein din raat chahiye

wa kar diye hain ilm ne dariya-e-marifat

andhon ko ab bhi kashf o karamat chahiye

jab qais ki kahani ab anjum ki dastan

duniya ko dil lagi ke liye baat chahiye