humse kar tu ki ya na kar iKHlas

ham se kar tū ki yā na kar iḳhlās

ham ko hai tujh se yaar par iḳhlās

apne muḳhlis kī baat kā hargiz

mat burā maan hai agar iḳhlās

mere aur us ke kyūñki sohbat ho

pamba se kab rakhe sharar iḳhlās

ḳhuun ho kar bhī terī tarf bahe

tujh se rakkhe the dil jigar iḳhlās

hai ġhanīmat rahe jo koī din

ham meñ aur us meñ yak-digar iḳhlās

vo nahīñ vaqt ab ki har yak meñ

dekhte the jidhar-tidhar iḳhlās

is zamāne meñ ai 'hasan' mat pūchh

hai mohabbat kahāñ kidhar iḳhlās

hum se kar tu ki ya na kar iKHlas

hum ko hai tujh se yar par iKHlas

apne muKHlis ki baat ka hargiz

mat bura man hai agar iKHlas

mere aur us ke kyunki sohbat ho

pamba se kab rakhe sharar iKHlas

KHun ho kar bhi teri tarf bahe

tujh se rakkhe the dil jigar iKHlas

hai ghanimat rahe jo koi din

hum mein aur us mein yak-digar iKHlas

wo nahin waqt ab ki har yak mein

dekhte the jidhar-tidhar iKHlas

is zamane mein ai 'hasan' mat puchh

hai mohabbat kahan kidhar iKHlas