humse na hogi tark-e-wafa ye aur kisi ko sunaen aap

ham se na hogī tark-e-vafā ye aur kisī ko sunā.eñ aap

ham na suneñge hazrat-e-nāseh laakh hameñ samjhā.eñ aap

sharm-o-hayā ke parde meñ karte the ham pe jafā.eñ aap

aap ko ham pahchān ga.e muñh āñchal se na chhupā.eñ aap

zulf kā tere in se koī mazmūñ jo raqam ho jaatā hai

fart-e-ḳhushī se le letā huuñ hāthoñ kī apne bulā.eñ aap

vāh-jī vā bas dekh liyā kyā vaz.a kī hai yahī pābandī

kahte is ko haiñ sharm-o-hayā ham jaañ se jaa.eñ na aa.eñ aap

sun chuke hāl-e-pursish-e-mahshar va.az kī 'anjum' had bhī hai

ye to nahīñ hai hukm-e-ḳhudā roz ek qayāmat Dhā.eñ aap

hum se na hogi tark-e-wafa ye aur kisi ko sunaen aap

hum na sunenge hazrat-e-naseh lakh hamein samjhaen aap

sharm-o-haya ke parde mein karte the hum pe jafaen aap

aap ko hum pahchan gae munh aanchal se na chhupaen aap

zulf ka tere in se koi mazmun jo raqam ho jata hai

fart-e-KHushi se le leta hun hathon ki apne bulaen aap

wah-ji wa bas dekh liya kya waza ki hai yahi pabandi

kahte is ko hain sharm-o-haya hum jaan se jaen na aaen aap

sun chuke haal-e-pursish-e-mahshar waz ki 'anjum' had bhi hai

ye to nahin hai hukm-e-KHuda roz ek qayamat Dhaen aap