humse rudad-e-mohabbat mein KHayanat na hui

ham se rūdād-e-mohabbat meñ ḳhayānat na huī

us se bichhḌe to kisī aur se ulfat na huī

dil meñ baste thā mere vo kabhī dhaḌkan kī tarah

baad is ke to mire dil ko mohabbat na huī

kis tarah sab ko batā.ūñ maiñ bichhaḌne kā sabab

zarb aisī milī mujh ko kabhī himmat na huī

us ko jaldī thī kisī aur se milne kī tabhī

aisā rūThā vo manāne kī bhī mohlat na huī

vahī shāmil hai mire ḳhūn-e-jigar meñ jis ko

mujh se milne kī dobāra kabhī chāhat na huī

jab talak thā vo mirī zaat meñ raushan 'kāshif'

merī āñkhoñ ko ujāle kī zarūrat na huī

hum se rudad-e-mohabbat mein KHayanat na hui

us se bichhDe to kisi aur se ulfat na hui

dil mein baste tha mere wo kabhi dhaDkan ki tarah

baad is ke to mere dil ko mohabbat na hui

kis tarah sab ko bataun main bichhaDne ka sabab

zarb aisi mili mujh ko kabhi himmat na hui

us ko jaldi thi kisi aur se milne ki tabhi

aisa ruTha wo manane ki bhi mohlat na hui

wahi shamil hai mere KHun-e-jigar mein jis ko

mujh se milne ki dobara kabhi chahat na hui

jab talak tha wo meri zat mein raushan 'kashif'

meri aankhon ko ujale ki zarurat na hui