humse wo be-ruKHi se milta hai

ham se vo be-ruḳhī se miltā hai

jī ko paiġhām jī se miltā hai

ham ko bāvar na thā adāvat kā

silsila āshiqī se miltā hai

rishta-e-irtiqā-e-insānī

zehn kī tishnagī se miltā hai

dast-e-taḳh.īl ko koī dāman

baḳht kī yāvarī se miltā hai

dostī aur dushmanī kā mazā

dost kī dushmanī se miltā hai

zauq baḌhtā hai āshnā.ī kā

jab vo begānagī se miltā hai

ruḳh ko taz.īn kā nayā pahlū

aap kī be-ruḳhī se miltā hai

hai vo miltā hī kis liye 'hāmid'

ham se jo be-dilī se miltā hai

hum se wo be-ruKHi se milta hai

ji ko paigham ji se milta hai

hum ko bawar na tha adawat ka

silsila aashiqi se milta hai

rishta-e-irtiqa-e-insani

zehn ki tishnagi se milta hai

dast-e-taKHil ko koi daman

baKHt ki yawari se milta hai

dosti aur dushmani ka maza

dost ki dushmani se milta hai

zauq baDhta hai aashnai ka

jab wo beganagi se milta hai

ruKH ko tazin ka naya pahlu

aap ki be-ruKHi se milta hai

hai wo milta hi kis liye 'hamid'

hum se jo be-dili se milta hai