ham-shakl kah diya tha ruKH-e-la-jawab ka

ham-shakl kah diyā thā ruḳh-e-lā-javāb kā

ab āsmān par hai dimāġh āftāb kā

kam kar de nuur kaam nahīñ hai naqāb kā

chhuptā nahīñ ġhubār se muñh āftāb kā

ye husn ek manzar-e-dil-kash hai ḳhvāb kā

sarkār e'tibār na kiije shabāb kā

ā.īna lā ke rakh diyā aaj un ke sāmne

qaa.il banā diyā nigah-e-intiḳhāb kā

kyā haal kar diyā hai mirā mujh ko dekh lo

tum kyā karoge is dil-e-ḳhāna-ḳharāb kā

vo kyā haiñ aaj un ke farishte bhī ā.eñge

vā'de kī shab nahīñ hai ye din hai hisāb kā

kyā ḳhuub kam-sinī meñ tumheñ intizār-e-hashr

aur hashr muntazir hai tumhāre shabāb kā

duniyā khaḌī hai un kī ziyārat ke vāste

mahshar banā huā hai zamāna shabāb kā

vo be-hijāb aur bhalā mere sāmne

ye kahiye band TuuT gayā hai naqāb kā

hasrat se dekhtā hai tabīboñ kā muñh marīz

shāyad samajh gayā hai ishāra javāb kā

sayyād sāmne se haTā le zarā qafas

ghar jal rahā hai bulbul-e-ḳhāna-ḳharāb kā

poñchhe haiñ ashk dāman-e-dariyā se mauj ne

dekhā gayā na phuuT ke ronā habāb kā

shak thā jo kāfiroñ ko nubuvvat meñ ai 'qamar'

shāhid maiñ hī banā thā risālat-ma.āb kā

ham-shakl kah diya tha ruKH-e-la-jawab ka

ab aasman par hai dimagh aaftab ka

kam kar de nur kaam nahin hai naqab ka

chhupta nahin ghubar se munh aaftab ka

ye husn ek manzar-e-dil-kash hai KHwab ka

sarkar e'tibar na kije shabab ka

aaina la ke rakh diya aaj un ke samne

qail bana diya nigah-e-intiKHab ka

kya haal kar diya hai mera mujh ko dekh lo

tum kya karoge is dil-e-KHana-KHarab ka

wo kya hain aaj un ke farishte bhi aaenge

wa'de ki shab nahin hai ye din hai hisab ka

kya KHub kam-sini mein tumhein intizar-e-hashr

aur hashr muntazir hai tumhaare shabab ka

duniya khaDi hai un ki ziyarat ke waste

mahshar bana hua hai zamana shabab ka

wo be-hijab aur bhala mere samne

ye kahiye band TuT gaya hai naqab ka

hasrat se dekhta hai tabibon ka munh mariz

shayad samajh gaya hai ishaara jawab ka

sayyaad samne se haTa le zara qafas

ghar jal raha hai bulbul-e-KHana-KHarab ka

ponchhe hain ashk daman-e-dariya se mauj ne

dekha gaya na phuT ke rona habab ka

shak tha jo kafiron ko nubuwwat mein ai 'qamar'

shahid main hi bana tha risalat-maab ka