hum tere shahr se yun jaan-e-wafa lauT aae

ham tire shahr se yuuñ jān-e-vafā lauT aa.e

jaise dīvār se Takrā ke sadā lauT aa.e

na koī ḳhvāb na manzar na koī pas-manzar

kitnā achchhā ho jo bachpan kī fazā lauT aa.e

aa ga.iiñ phir vahī mausam kī jabīñ par shikneñ

mas.ale phir vahī is baar bhī kyā lauT aa.e

apne āñgan meñ koī peḌ lagā tulsī kā

shāyad is tarah se phir ḳhvāb tirā lauT aa.e

jism se sote pasīne ke ubal uTThe haiñ

ab to behtar hai ki masmūm havā lauT aa.e

lauT ham aa.e 'mubārak' yuuñ dar-e-jānāñ se

jaise ākāsh se muflis kī duā lauT aa.e

hum tere shahr se yun jaan-e-wafa lauT aae

jaise diwar se Takra ke sada lauT aae

na koi KHwab na manzar na koi pas-manzar

kitna achchha ho jo bachpan ki faza lauT aae

aa gain phir wahi mausam ki jabin par shiknen

masale phir wahi is bar bhi kya lauT aae

apne aangan mein koi peD laga tulsi ka

shayad is tarah se phir KHwab tera lauT aae

jism se sote pasine ke ubal uTThe hain

ab to behtar hai ki masmum hawa lauT aae

lauT hum aae 'mubarak' yun dar-e-jaanan se

jaise aakash se muflis ki dua lauT aae