hum to ek girti hui diwar hain

ham to ik girtī huī dīvār haiñ

aap ke rahm-o-karam par baar haiñ

har qadam par haiñ salībeñ daar haiñ

zindagī ke rāste pur-ḳhār haiñ

aaj tak piite rahe haiñ ashk-e-ġham

zahr bhī piine ko ab tayyār haiñ

pā.eñge saaya bhī ik din dhuup meñ

vaqt ke gesū agar ḳhamdār haiñ

yaar to ḳhāmosh haiñ muddat huī

ab karam-farmā faqat aġhyār haiñ

kaun pūchhegā hameñ ab vaqt ke

haath meñ TuuTī huī talvār haiñ

aap kyā deñge mohabbat kā payām

aap to ḳhud barsar-e-paikār haiñ

jis meñ 'sailānī' nahīñ dād-e-suḳhan

ham sabhī us daur ke fankār haiñ

hum to ek girti hui diwar hain

aap ke rahm-o-karam par bar hain

har qadam par hain saliben dar hain

zindagi ke raste pur-KHar hain

aaj tak pite rahe hain ashk-e-gham

zahr bhi pine ko ab tayyar hain

paenge saya bhi ek din dhup mein

waqt ke gesu agar KHamdar hain

yar to KHamosh hain muddat hui

ab karam-farma faqat aghyar hain

kaun puchhega hamein ab waqt ke

hath mein TuTi hui talwar hain

aap kya denge mohabbat ka payam

aap to KHud barsar-e-paikar hain

jis mein 'sailani' nahin dad-e-suKHan

hum sabhi us daur ke fankar hain