hum to KHush the ki chalo dil ka junun kuchh kam hai

ham to ḳhush the ki chalo dil kā junūñ kuchh kam hai

ab jo ārām bahut hai to sukūñ kuchh kam hai

rañg-e-girya ne dikhā.ī nahīñ aglī sī bahār

ab ke lagtā hai ki āmezish-e-ḳhūñ kuchh kam hai

ab tirā hijr musalsal hai to ye bhed khulā

ġham-e-dil se ġham-e-duniyā kā fusūñ kuchh kam hai

us ne dukh saare zamāne kā mujhe baḳhsh diyā

phir bhī lālach kā taqāzā hai kahūñ kuchh kam hai

rāh-e-dunyā se nahīñ dil kī guzargāh se aa

fāsla garche ziyāda hai pe yuuñ kuchh kam hai

tū ne dekhā hī nahīñ mujh ko bhale vaqtoñ meñ

ye ḳharābī ki maiñ jis haal meñ huuñ kuchh kam hai

aag hī aag mire qarya-e-tan meñ hai 'farāz'

phir bhī lagtā hai abhī soz-e-darūñ kuchh kam hai

hum to KHush the ki chalo dil ka junun kuchh kam hai

ab jo aaram bahut hai to sukun kuchh kam hai

rang-e-girya ne dikhai nahin agli si bahaar

ab ke lagta hai ki aamezish-e-KHun kuchh kam hai

ab tera hijr musalsal hai to ye bhed khula

gham-e-dil se gham-e-duniya ka fusun kuchh kam hai

us ne dukh sare zamane ka mujhe baKHsh diya

phir bhi lalach ka taqaza hai kahun kuchh kam hai

rah-e-dunya se nahin dil ki guzargah se aa

fasla garche ziyaada hai pe yun kuchh kam hai

tu ne dekha hi nahin mujh ko bhale waqton mein

ye KHarabi ki main jis haal mein hun kuchh kam hai

aag hi aag mere qarya-e-tan mein hai 'faraaz'

phir bhi lagta hai abhi soz-e-darun kuchh kam hai