hum to yun KHush the ki ek tar gareban mein hai

ham to yuuñ ḳhush the ki ik taar garebān meñ hai

kyā ḳhabar thī ki bahār is ke bhī armān meñ hai

ek zarb aur bhī ai zindagī-e-tesha-ba-dast

saañs lene kī sakat ab bhī mirī jaan meñ hai

maiñ tujhe kho ke bhī zinda huuñ ye dekhā tū ne

kis qadar hausla haare hue insān meñ hai

fāsle qurb ke sho.aloñ ko havā dete haiñ

meñ tire shahr se duur aur tū mire dhyān meñ hai

sar-e-dīvār farozāñ hai abhī ek charāġh

ai nasīm-e-saharī kuchh tire imkān meñ hai

dil dhaḌakne kī sadā aatī hai gāhe-gāhe

jaise ab bhī tirī āvāz mire kaan meñ hai

ḳhilqat-e-shahr ke har zulm ke bā-vasf 'farāz'

haa.e vo haath ki apne hī garebān meñ hai

hum to yun KHush the ki ek tar gareban mein hai

kya KHabar thi ki bahaar is ke bhi arman mein hai

ek zarb aur bhi ai zindagi-e-tesha-ba-dast

sans lene ki sakat ab bhi meri jaan mein hai

main tujhe kho ke bhi zinda hun ye dekha tu ne

kis qadar hausla haare hue insan mein hai

fasle qurb ke shoalon ko hawa dete hain

mein tere shahr se dur aur tu mere dhyan mein hai

sar-e-diwar farozan hai abhi ek charagh

ai nasim-e-sahari kuchh tere imkan mein hai

dil dhaDakne ki sada aati hai gahe-gahe

jaise ab bhi teri aawaz mere kan mein hai

KHilqat-e-shahr ke har zulm ke ba-wasf 'faraaz'

hae wo hath ki apne hi gareban mein hai