hum ujale tere galiyon ke jidhar jate hain

ham ujāle tire galiyoñ ke jidhar jaate haiñ

suune suune se dar-o-bām sañvar jaate haiñ

laakh hañstā hai khaḌā rāhoñ meñ āñkhoñ kā hujūm

tere vahshī haiñ ki chup-chāp guzar jaate haiñ

koī kis dil se sajā.e hameñ āñkhoñ meñ bhalā

ham vo sapne haiñ jo lamhoñ meñ bikhar jaate haiñ

ik na.e ḳhvāb kī hasrat meñ na pūchh ai hamdam

āñkhoñ āñkhoñ meñ shab-o-roz guzar jaate haiñ

ham musāfir haiñ rah-e-zīst meñ chalte chalte

koī bhī ham ko pukāre to Thahar jaate haiñ

raushnī naam kī har shai se mohabbat thī kabhī

ab to har sub.h-e-ziyā-bār se Dar jaate haiñ

ham ki sahrā-e-mohabbat meñ dam-e-ḳhāmoshī

kitnī āvāzoñ ke saa.e se guzar jaate haiñ

ham hirāsāñ to nahīñ gardish-e-daurāñ se magar

aap kī shoḳhī-e-raftār se Dar jaate haiñ

mahvashoñ ko na dikhā ā.ina-e-ġham 'nāzim'

ye vo chehre haiñ ki pal bhar meñ utar jaate haiñ

hum ujale tere galiyon ke jidhar jate hain

sune sune se dar-o-baam sanwar jate hain

lakh hansta hai khaDa rahon mein aankhon ka hujum

tere wahshi hain ki chup-chap guzar jate hain

koi kis dil se sajae hamein aankhon mein bhala

hum wo sapne hain jo lamhon mein bikhar jate hain

ek nae KHwab ki hasrat mein na puchh ai hamdam

aankhon aankhon mein shab-o-roz guzar jate hain

hum musafir hain rah-e-zist mein chalte chalte

koi bhi hum ko pukare to Thahar jate hain

raushni nam ki har shai se mohabbat thi kabhi

ab to har subh-e-ziya-bar se Dar jate hain

hum ki sahra-e-mohabbat mein dam-e-KHamoshi

kitni aawazon ke sae se guzar jate hain

hum hirasan to nahin gardish-e-dauran se magar

aap ki shoKHi-e-raftar se Dar jate hain

mahwashon ko na dikha aaina-e-gham 'nazim'

ye wo chehre hain ki pal bhar mein utar jate hain