hum unki talKH-bayani pasand karte hain

ham un kī talḳh-bayānī pasand karte haiñ

vo lab ġhazab haiñ ki hanzal ko qand karte haiñ

nahīñ pahuñchte mire gul ke qadd-e-mauzūñ ko

hazār sarv qad apnā buland karte haiñ

na hūñgā tārik-e-mai nāsehoñ ke kahne se

ye kyoñ phirāte haiñ sar kis ko pand karte haiñ

sunahre kapḌoñ meñ malte haiñ itr sandal kā

vo aaj apne ko sonā-sūgand karte haiñ

vo gaalī de ke lab-e-shakkarīñ se āshiq ko

miThās naql-e-suḳhan kī do chand karte haiñ

unheñ to manā nahīñ karte zulm se nāseh

hamīñ ko ta.ana-o-tashnī.a-o-pand karte haiñ

kisī ke hai lab-e-shīrīñ kī hamsarī kī sazā

jo nai-shakar ke judā band band karte haiñ

vo dekhte haiñ jise ḳhvāb meñ na dekhe koī

jab āñkheñ apnī tasavvur meñ band karte haiñ

hamāre haal par ab tak itaab hai 'bāqī'

vo imtihān bhalā tā-ba-chand karte haiñ

hum un ki talKH-bayani pasand karte hain

wo lab ghazab hain ki hanzal ko qand karte hain

nahin pahunchte mere gul ke qadd-e-mauzun ko

hazar sarw qad apna buland karte hain

na hunga tarik-e-mai nasehon ke kahne se

ye kyon phiraate hain sar kis ko pand karte hain

sunahre kapDon mein malte hain itr sandal ka

wo aaj apne ko sona-sugand karte hain

wo gali de ke lab-e-shakkarin se aashiq ko

miThas naql-e-suKHan ki do chand karte hain

unhen to mana nahin karte zulm se naseh

hamin ko tana-o-tashnia-o-pand karte hain

kisi ke hai lab-e-shirin ki hamsari ki saza

jo nai-shakar ke juda band band karte hain

wo dekhte hain jise KHwab mein na dekhe koi

jab aankhen apni tasawwur mein band karte hain

hamare haal par ab tak itab hai 'baqi'

wo imtihan bhala ta-ba-chand karte hain