hum un se kar gae hain kinara kabhi kabhi

ham un se kar ga.e haiñ kinārā kabhī kabhī

dil ho gayā hai jaan se pyārā kabhī kabhī

rātoñ kī ḳhāmushī meñ mire dil pe rakh ke haath

letī hai kā.enāt sahārā kabhī kabhī

is tarah bhī vo aate haiñ āġhosh-e-shauq meñ

girtā hai jaise TuuT ke taarā kabhī kabhī

maiñ ne jahān-e-shauq ko be-jazba-e-numūd

apne hī dekhne ko sañvārā kabhī kabhī

jis tarah sarsarā.e chaman meñ shamīm-e-gul

is tarah us ne mujh ko pukārā kabhī kabhī

ab koī kyā kare jo ba-sad sa.ī-e-zabt-e-rāz

aa jaa.e lab pe naam tumhārā kabhī kabhī

ab ahl-e-shahr kis liye 'shādāñ' se haiñ ḳhafā

aatā hai shahr meñ vo bechārā kabhī kabhī

hum un se kar gae hain kinara kabhi kabhi

dil ho gaya hai jaan se pyara kabhi kabhi

raaton ki KHamushi mein mere dil pe rakh ke hath

leti hai kaenat sahaara kabhi kabhi

is tarah bhi wo aate hain aaghosh-e-shauq mein

girta hai jaise TuT ke tara kabhi kabhi

main ne jahan-e-shauq ko be-jazba-e-numud

apne hi dekhne ko sanwara kabhi kabhi

jis tarah sarsarae chaman mein shamim-e-gul

is tarah us ne mujh ko pukara kabhi kabhi

ab koi kya kare jo ba-sad sai-e-zabt-e-raaz

aa jae lab pe nam tumhaara kabhi kabhi

ab ahl-e-shahr kis liye 'shadan' se hain KHafa

aata hai shahr mein wo bechaara kabhi kabhi