hum un se TuT kar milte hain mil kar TuT jate hain

ham un se TuuT kar milte haiñ mil kar TuuT jaate haiñ

tamāsha hai ki shīshe se bhī patthar TuuT jaate haiñ

maiñ huuñ vo saḳht-jāñ hai jis kī jur.at itnī mustahkam

mire siine tak aate aate ḳhanjar TuuT jaate haiñ

jo rishte hote haiñ qaa.em faqat matlab-parastī par

vahī rishte yaqīnan ḳhud hī aksar TuuT jaate haiñ

jafā ahl-e-vafā par karke jab ehsās hotā hai

vahīñ dil-soz-o-dil-āzār dilbar TuuT jaate haiñ

kabhī āñdhī se titlī ko bhī jumbish kuchh nahīñ hotī

kabhī shāhīn ke mazbūt shah-par TuuT jaate haiñ

nazar āḳhir nazar hai kaam kar jaatī hai pal bhar meñ

haqīqat ā.inoñ kī kyā hai patthar TuuT jaate haiñ

tire ash.ār meñ vo soz hai vo dard hai pinhāñ

tire ash.ār sun kar ham to 'anvar' TuuT jaate haiñ

hum un se TuT kar milte hain mil kar TuT jate hain

tamasha hai ki shishe se bhi patthar TuT jate hain

main hun wo saKHt-jaan hai jis ki jurat itni mustahkam

mere sine tak aate aate KHanjar TuT jate hain

jo rishte hote hain qaem faqat matlab-parasti par

wahi rishte yaqinan KHud hi aksar TuT jate hain

jafa ahl-e-wafa par karke jab ehsas hota hai

wahin dil-soz-o-dil-azar dilbar TuT jate hain

kabhi aandhi se titli ko bhi jumbish kuchh nahin hoti

kabhi shahin ke mazbut shah-par TuT jate hain

nazar aaKHir nazar hai kaam kar jati hai pal bhar mein

haqiqat aainon ki kya hai patthar TuT jate hain

tere ashaar mein wo soz hai wo dard hai pinhan

tere ashaar sun kar hum to 'anwar' TuT jate hain