hum uske samne husn-o-jamal kya rakhte

ham us ke sāmne husn-o-jamāl kyā rakhte

jo be-misāl hai us kī misāl kyā rakhte

jo bevafā.ī ko apnā hunar samajhtā hai

ham us ke aage vafā kā savāl kyā rakhte

hamārā dil kisī jāgīr se nahīñ arzāñ

ham us ke sāmne māl-o-manāl kyā rakhte

use to rishte nibhāne kī aarzū hī nahīñ

phir us kī ek nishānī sambhāl kyā rakhte

jo dil pe choT lagāne meñ ḳhuub māhir hai

ham us ke sāmne apnā kamāl kyā rakhte

hamāre zarf kā logoñ ne imtihān liyā

zarā sī baat kā dil meñ malāl kyā rakhte

jo apne dil se 'iram' ko nikāl baiThā hai

ham us ke sāmne hijr-o-visāl kyā rakhte

hum us ke samne husn-o-jamal kya rakhte

jo be-misal hai us ki misal kya rakhte

jo bewafai ko apna hunar samajhta hai

hum us ke aage wafa ka sawal kya rakhte

hamara dil kisi jagir se nahin arzan

hum us ke samne mal-o-manal kya rakhte

use to rishte nibhane ki aarzu hi nahin

phir us ki ek nishani sambhaal kya rakhte

jo dil pe choT lagane mein KHub mahir hai

hum us ke samne apna kamal kya rakhte

hamare zarf ka logon ne imtihan liya

zara si baat ka dil mein malal kya rakhte

jo apne dil se 'iram' ko nikal baiTha hai

hum us ke samne hijr-o-visal kya rakhte