hama-waqt jo mere sath hain ye ubharte Dubte sae se

hama-vaqt jo mire saath haiñ ye ubharte Dūbte saa.e se

kisī raushnī ke sarāb haiñ ki mile har apne parā.e se

ḳham-e-jāda se maiñ piyāda-pā kabhī dekh letā huuñ ḳhvāb-sā

kahīñ duur jaise dhuāñ uThā kisī bhūlī-bisrī sarā.e se

uThī mauj-e-dard to yak-ba-yak mire ās-pās bikhar ga.e

mah-e-nīm-shab ke idhar udhar jo laraz rahe the kinā.e se

milā mujh ko raah meñ ik nagar jahāñ koī shaḳhs na thā magar

vo zamīñ shagufta shagufta sī vo makāñ nahā.e nahā.e se

mire kār-zār-e-hayāt meñ rahe umr-bhar ye muqāble

kabhī saaya dab gayā dhuup se kabhī dhuup dab ga.ī saa.e se

hama-waqt jo mere sath hain ye ubharte Dubte sae se

kisi raushni ke sarab hain ki mile har apne parae se

KHam-e-jada se main piyaada-pa kabhi dekh leta hun KHwab-sa

kahin dur jaise dhuan uTha kisi bhuli-bisri sarae se

uThi mauj-e-dard to yak-ba-yak mere aas-pas bikhar gae

mah-e-nim-shab ke idhar udhar jo laraz rahe the kinae se

mila mujh ko rah mein ek nagar jahan koi shaKHs na tha magar

wo zamin shagufta shagufta si wo makan nahae nahae se

mere kar-zar-e-hayat mein rahe umr-bhar ye muqable

kabhi saya dab gaya dhup se kabhi dhup dab gai sae se