hamara aaina be-kar ho gaya to phir!

hamārā aa.ina be-kār ho gayā to phir!

tumhārā husn trahdār ho gayā to phir!

milā ke ḳhaak meñ vo sochtā rahā barsoñ

maiñ aa.ine meñ numūdār ho gayā to phir!

rukāvaTeñ to safar kā javāz hotī haiñ

ye rāsta kahīñ hamvār ho gayā to phir!

vo māhtāb hai, maiñ jhiil aur safar darpesh

vo mujh se hotā huā paar ho gayā to phir,

tamām shahr ne lauTā diyā hai ḳhālī haath

aur us ke dar se bhī inkār ho gayā to phir!

to kyuuñ na rāsta tabdīl kar liyā jaa.e

kahīñ jo mujh se tumheñ pyaar ho gayā to phir!

hamara aaina be-kar ho gaya to phir!

tumhaara husn trahdar ho gaya to phir!

mila ke KHak mein wo sochta raha barson

main aaine mein numudar ho gaya to phir!

rukawaTen to safar ka jawaz hoti hain

ye rasta kahin hamwar ho gaya to phir!

wo mahtab hai, main jhil aur safar darpesh

wo mujh se hota hua par ho gaya to phir,

tamam shahr ne lauTa diya hai KHali hath

aur us ke dar se bhi inkar ho gaya to phir!

to kyun na rasta tabdil kar liya jae

kahin jo mujh se tumhein pyar ho gaya to phir!