hamara ho ke bhi kab apne bas mein rahta hai

hamārā ho ke bhī kab apne bas meñ rahtā hai

ye dil hamesha tirī dastaras meñ rahtā hai

use sharābī na samjho ki sub.h hote hī

vo mandiroñ ke sunahre kalas meñ rahtā hai

hai e'tibār se be-e'tibār sarhad tak

vo fāsla jo mire ham-nafas meñ rahtā hai

tamannā ye hai ki kuchh lamhe dil ke naam kareñ

magar dimāġh ki hirs-o-havas meñ rahtā hai

ham apne ghar meñ bhī kuchh is tarah se rahte haiñ

ki jaise koī parinda qafas meñ rahtā hai

talāsh kartī hai duniyā jise ba-nām-e-'zamīr'

vo naġhma ban ke sadā-e-jaras meñ rahtā hai

hamara ho ke bhi kab apne bas mein rahta hai

ye dil hamesha teri dastaras mein rahta hai

use sharabi na samjho ki subh hote hi

wo mandiron ke sunahre kalas mein rahta hai

hai e'tibar se be-e'tibar sarhad tak

wo fasla jo mere ham-nafas mein rahta hai

tamanna ye hai ki kuchh lamhe dil ke nam karen

magar dimagh ki hirs-o-hawas mein rahta hai

hum apne ghar mein bhi kuchh is tarah se rahte hain

ki jaise koi parinda qafas mein rahta hai

talash karti hai duniya jise ba-nam-e-'zamir'

wo naghma ban ke sada-e-jaras mein rahta hai