hamara man bhi usi mein magan raha hoga

hamārā man bhī usī meñ magan rahā hogā

usī kā dhyān hameñ ādatan rahā hogā

vo jis ko toḌne kā terā man rahā hogā

qafas thā ruuh kā ya.anī badan rahā hogā

tabhī to ḳhuub bahut ḳhuub lag rahī thī ġhazal

tire ḳhayāl kā hī pairahan rahā hogā

adā-e-rasm-e-falak kār-e-āḳhirī kar ke

libās chāñd dobāra pahan rahā hogā

maiñ chauñktā hī nahīñ gar mujhe ḳhabar hotī

vo terā aanā hī phir daf.atan rahā hogā

sunā hai zikr pe mere bahut thā sanjīda

vo aisā hai to nahīñ aisā ban rahā hogā

shikan khulī jo jabīñ se to ban ga.ī aañsū

hamārī fikr meñ kuchh ḳhaas fan rahā hogā

hamara man bhi usi mein magan raha hoga

usi ka dhyan hamein aadatan raha hoga

wo jis ko toDne ka tera man raha hoga

qafas tha ruh ka yani badan raha hoga

tabhi to KHub bahut KHub lag rahi thi ghazal

tere KHayal ka hi pairahan raha hoga

ada-e-rasm-e-falak kar-e-aKHiri kar ke

libas chand dobara pahan raha hoga

main chaunkta hi nahin gar mujhe KHabar hoti

wo tera aana hi phir dafatan raha hoga

suna hai zikr pe mere bahut tha sanjida

wo aisa hai to nahin aisa ban raha hoga

shikan khuli jo jabin se to ban gai aansu

hamari fikr mein kuchh KHas fan raha hoga