hamara qissa-e-tahsin subh-o-sham aaya

hamārā qissa-e-tahsīn sub.h-o-shām aaya

jahāñ se chheḌ diyā us meñ terā naam aaya

junūñ ko naam to har chand ik se ek mile

magar sirishta-e-hastī meñ ik na kaam aaya

use ham apnā samajh baiThe jo na apnā thā

ik aisā getī-e-jazbāt meñ maqām aaya

matā-e-qalb-o-nazar le ke ham vahāñ pahuñche

jahāñ na jazba-e-be-iḳhtiyār kaam aaya

talāsh-e-zāt meñ apnī shanāḳht kho baiThe

ḳhudī pe baar thā jo phir vahī maqām aaya

jo baat bhī huī mub.ham huī bharam na khulā

rah-e-talab meñ vahī bārhā maqām aaya

'zubair' jis kā rahā intizār saarī umr

salām kar ke gayā jab na phir salām aaya

hamara qissa-e-tahsin subh-o-sham aaya

jahan se chheD diya us mein tera nam aaya

junun ko nam to har chand ek se ek mile

magar sirishta-e-hasti mein ek na kaam aaya

use hum apna samajh baiThe jo na apna tha

ek aisa geti-e-jazbaat mein maqam aaya

mata-e-qalb-o-nazar le ke hum wahan pahunche

jahan na jazba-e-be-iKHtiyar kaam aaya

talash-e-zat mein apni shanaKHt kho baiThe

KHudi pe bar tha jo phir wahi maqam aaya

jo baat bhi hui mubham hui bharam na khula

rah-e-talab mein wahi barha maqam aaya

'zubair' jis ka raha intizar sari umr

salam kar ke gaya jab na phir salam aaya