ہمارا راز داں کوئی نہیں ہے

ہمارا راز داں کوئی نہیں ہے

محبت کی زباں کوئی نہیں ہے

ہر اک غنچہ ہے مرجھایا ہوا سا

چمن میں باغباں کوئی نہیں ہے

قفس سے چھوٹ کر جائیں کہاں ہم

ہمارا آشیاں کوئی نہیں ہے

کہاں جائیں یہ درماندہ مسافر

امیر کارواں کوئی نہیں ہے

اندھیرے راستے روکے کھڑے ہیں

چراغ کارواں کوئی نہیں ہے

ہیں پژمردہ تری یادوں کی کلیاں

بہار جاوداں کوئی نہیں ہے

عبارت ہے حیات و مرگ تم سے

ہماری داستاں کوئی نہیں ہے

یہاں ہر جنس بک جاتی ہے ممتازؔ

سخن کا قدرداں کوئی نہیں ہے