hamara zikr jo aaya to yun pukara wo

hamārā zikr jo aaya to yuuñ pukārā vo

anā-parast farebī suḳhan kā maarā vo

dhueñ meñ Dhaltā huā be-imān dīpak maiñ

falak-nashīn chamaktā huā sitārā vo

shab-e-visāl kā tum māñgte ho ham se hisāb

magar jo vaqt tumhāre binā guzārā vo

'ajīb rishte ne bāñdhā huā hai donoñ ko

maiñ naqsh dhuup kā shabnam kā isti'āra vo

samajh rahā thā jise maiñ bas ek mauj-e-sarāb

jaḌeñ ukhāḌ gayā merī tez dhārā vo

na jaane kis kī nazar ko fareb detā hai

hamārī aañkh se ojhal huā nazārā vo

jhalak rahā thā jo tasvīr se mirī 'irfān'

hai ek ḳhvāb se mansūb rang saarā vo

hamara zikr jo aaya to yun pukara wo

ana-parast farebi suKHan ka mara wo

dhuen mein Dhalta hua be-iman dipak main

falak-nashin chamakta hua sitara wo

shab-e-visal ka tum mangte ho hum se hisab

magar jo waqt tumhaare bina guzara wo

'ajib rishte ne bandha hua hai donon ko

main naqsh dhup ka shabnam ka isti'ara wo

samajh raha tha jise main bas ek mauj-e-sarab

jaDen ukhaD gaya meri tez dhaara wo

na jaane kis ki nazar ko fareb deta hai

hamari aankh se ojhal hua nazara wo

jhalak raha tha jo taswir se meri 'irfan'

hai ek KHwab se mansub rang sara wo