hamare ghar ki fazaon mein yas kafi hai

hamāre ghar kī fazāoñ meñ yaas kaafī hai

charāġh jalte raheñ ās-pās kaafī hai

nigah milāte hue Dar rahe haiñ logoñ se

ki har nigāh meñ ḳhauf-o-hirās kaafī hai

vahīñ pe hai vo jahāñ rasm-o-rāh ḳhatm huī

to ye kaho ki abhī tak udaas kaafī hai

maiñ dekhtā hī rahā rang us ke chehre kā

maiñ jāntā thā ki vo ġham-shanās kaafī hai

ḳhulūs kahte haiñ jis ko vo apne paas kahāñ

yahī sunā hai ki auroñ ke paas kaafī hai

ḳhabar kisī ko nahīñ kaun kis tarah Duubā

magar hujūm to dariyā ke paas kaafī hai

nazākat-e-dil-e-'iqbāl' kaun samjhegā

ye chand log raheñ apne paas kaafī hai

hamare ghar ki fazaon mein yas kafi hai

charagh jalte rahen aas-pas kafi hai

nigah milate hue Dar rahe hain logon se

ki har nigah mein KHauf-o-hiras kafi hai

wahin pe hai wo jahan rasm-o-rah KHatm hui

to ye kaho ki abhi tak udas kafi hai

main dekhta hi raha rang us ke chehre ka

main jaanta tha ki wo gham-shanas kafi hai

KHulus kahte hain jis ko wo apne pas kahan

yahi suna hai ki auron ke pas kafi hai

KHabar kisi ko nahin kaun kis tarah Duba

magar hujum to dariya ke pas kafi hai

nazakat-e-dil-e-'iqbaal' kaun samjhega

ye chand log rahen apne pas kafi hai