hamare hath se qudrat ne kya jauhar dikhae hain

hamāre haath se qudrat ne kyā jauhar dikhā.e haiñ

jo nuqte ḳhud nahīñ samjhe vo auroñ ko sikhā.e haiñ

ujāle kī sahar laanā nahīñ sab ke muqaddar meñ

falak pe raat ne yuuñ to ka.ī sūraj ugaa.e haiñ

haqīqat ke samundar meñ dhule sab rang hastī ke

sahar kī raushnī ne niiñd se sapne bhagā.e haiñ

taqaddus un ke chehroñ kā bayāñ kartā hai ā.īna

yahāñ kirdār jo ashk-e-nadāmat se nahā.e haiñ

baḌī mushkil se aaya qalb ke jazbāt par qaabū

ye bachche raat ke pichhle pahar ham ne sulā.e haiñ

'fidā' kaise bayāñ kar luuñ maiñ apne shahr kā qissa

yahāñ ahl-e-vafā ne kis tarah aañsū chhupā.e haiñ

hamare hath se qudrat ne kya jauhar dikhae hain

jo nuqte KHud nahin samjhe wo auron ko sikhae hain

ujale ki sahar lana nahin sab ke muqaddar mein

falak pe raat ne yun to kai suraj ugae hain

haqiqat ke samundar mein dhule sab rang hasti ke

sahar ki raushni ne nind se sapne bhagae hain

taqaddus un ke chehron ka bayan karta hai aaina

yahan kirdar jo ashk-e-nadamat se nahae hain

baDi mushkil se aaya qalb ke jazbaat par qabu

ye bachche raat ke pichhle pahar hum ne sulae hain

'fida' kaise bayan kar lun main apne shahr ka qissa

yahan ahl-e-wafa ne kis tarah aansu chhupae hain